Өткөн түнү Орусиянын Ленинград облусундагы Кириши шаарына дрондон чабуул болду. Бийлик абадан коргонуу системалары иштегенин жана “өнөр жай зонасында өрт чыкканын” билдирди.
Облустун губернатору Александр Дрозденконун айтымында, шаар үстүнөн жети дрон атып түшүрүлдү.
Astra Телеграм каналы күбөлөрдүн сүрөттөрүнө жана видеолоруна шилтеме берип, “Киришинефтеоргсинтез” (КИНЕФ) мунай иштетүү заводунда өрт чыкканын жазды. Бул – Орусиядагы эң ири мунай кайра иштетүүчү ишканалардын бири. Ал жай мурда да дрон чабуулдарына кабылган.
Орусиянын Коргоо министрлиги өткөн түнү абадан коргонуу системасы 117 украиналык дронду атып түшүргөнүн билдирди. Алардын көбү Брянск, Волгоград жана Курск облустарында байкалган.
Украинада Орусиянын 2-октябрдагы куралдын бир нече түрүнөн аралаш соккуларынан Донецк, Харьков жана Херсон облустары жабыркаганын, жапырт аткылоонун кесепетинен бир кишинин өмүрү кыйылып, 11 киши жараат алганын жергиликтүү бийлик өкүлдөрү кабарлашты.
Ал эми 3-октябрга караган түнү учкучсуз учактардын чабуулуна Днепропетров облусу кабылганын башчысы Сергей Лысак маалымдады. Анын айтымында, Днепрде өрт тутанып, азыркы тапта аны өчүрүү аракети көрүлүп жатат. Айрым жерлерде жер тамдар зыян тартканы маалымдалды.
Полтава облусунда, жергиликтүү администрациянын маалыматына караганда, энергетика объектилери жабыркады.
Запорожье облусунда фугастык авиабомбалардан төртөө жана FPV дрондор учурулганын, 50 жаштагы аял жана 29 жаштагы эркек жараат алганы, гараж жана машина толук күйүп кеткени айтылды.
"Радар" мониторинг каналы эсептеп чыккандай, жумага караган түнү орус аскерлери 200дөн ашуун учкучсуз учак, 17 канаттуу ракета жана 7 баллистикалык ракета учурушту.
Орусияда Пермь крайынын Березники шаарында жайгашкан "Азот" химия заводу учкучсуз учактардын чабуулуна кабылганын аймактын башчысы Дмитрий Махонин 3-октябрда кабарлап, бул үчүн Украинаны айыптады.
Губернатордун айтымында, технологиялык цикл бир саамга токтоп, азыр ишкана кадимки тартибинде иштеп жатат.
"Экологиялык абалга коркунуч жок, адамдардын коопсуздугуна да коркунуч келтирген эч нерсе жок", - деген Махонин турак үйлөрдүн бири зыян тартканын, адамдар арасында жоготуу катталбаганын кошумчалады.
Ал эми бир катар жалпыга маалымдоо каражаттары химиялык заводдун аймагында кеминде эки жолу жарылуу болгонун жергиликүү тургундар айтып бергенин жазышты.
"Азот" заводу жер семирткич өндүрүлүүчү ири ишканалардын бири. Ал жерде жардыргыч заттар үчүн да компоненттер жасалат.
Березники шаары Украинанын чек арасынан дээрлик 1,5 миң чакырым алыс жайгашкан аймак.
Орусиянын Коргоо министрлиги Пермь крайындагы сокку тууралуу расмий маалымат берген жок. Болгону 3-октябрга караган түнү Кара деңиздин акваториясында, Воронеж, Белгород жана Курск облустарында, аннексияланган Крым жарым аралында Украинанын кеминде 20 согуштук дрону атып түшүрүлгөнүн кабарлады.
Орусия коңшусу Украинага каршы толук масштабдуу согушун 2022-жылдын февралында баштаган, ошондон бери куралдын көптөгөн түрлөрүнөн күн сайын аткылап келатат.
Орусиянын президенти Владимир Путин бейшембиде “Валдай” эл аралык талкуу клубунун жыйынында сүйлөп жатып Европанын куралдануусу күчөгөн учурда Москва да жооп чараларын көрүшү мүмкүн экенин билдирди. Ал процесстин тездик менен жүрүп жатканын белгиледи.
“Мисалы, Германия кайрадан Европадагы эң күчтүү армия болушубуз керек деп жатат. Макул, биз муну кунт коюп угуп, эмнени кыйытканын көрүп турабыз. Орусиянын жооп чаралары көп күттүрбөйт деп ойлойм, буга эч кимдин күмөнү жок. Жооп өтө ишенимдүү болот. Бул дал жооп чара. Биз өзүбүз эч качан аскердик каршылашууну баштаган эмеспиз”, - деди Украинага каршы согуш ачканына төрт жылга аяк баскан Орусиянын президенти Путин.
Орус лидери Украинадагы согуштун уланышы үчүн Европа өлкөлөрүн күнөөлөдү.
“Тилекке каршы, азырынча согуш аракеттерин токтото албай жатабыз. Бирок мунун жоопкерчилиги көпчүлүктө эмес, азчылыктын мойнунда, биринчи кезекте - жаңжалды тынымсыз күчөтүп жаткан Европада”, – деди Путин.
Сентябрдан тартып Евробиримдик өлкөлөрүнүн аба мейкиндигине орус дрондору бир канча ирет киргени тууралуу маалымат тарады. Ошондой эле Дания, Германия жана башка бир катар мамлекеттердеги маанилүү инфраструктура объектилеринин үстүнөн белгисиз учкучсуз аппараттар байкалган.
1-октябрда Копенгагенде өткөн ЕБ саммитинде лидерлер бул окуяларды эске алуу менен коопсуздук маселесин талкуулашты. Айрыкча Еврокомиссия мурда сунуштаган биримдиктин чыгыш чек арасын бойлой “дрондор дубалын” куруу демилгеси көтөрүлдү. Бир катар лидерлер бул демилгени колдоп, ал учкучсуз аппараттардын чабуулунан коргоо системаларын кеңири жайылтууну камтый турганын белгилешти.
Орусия 2022-жылдын февралынан бери Украинага каршы кеңири масштабдуу согушун улантып келет. Ал орус аскерлеринин украин жерине басып кириши менен башталган.
Кремль Украина жана европалык өлкөлөр сунуштаган узак мөөнөттүү ок атышууну токтотуу сунушун четке какты. Москва муну “жаңжалдын түпкү себептерин жоюу зарыл” деп түшүндүрүп келет. Орус бийлиги “түпкү себеп” катары Украинадагы орус тилдүү жарандардын укуктарынын бузулушун жана Киевдин НАТОго кирүүгө умтулуусун атаган.