Украина Орусиянын энергетика тармагына жасаган соккуларынын кесепеттерин жоюуну улантууда. Орусиянын энергетикалык объектилерине болгон массалык соккусунан кийин Харьков метросу экинчи күн катары менен иштебей калды. 9-ноябрь күнү эртең менен поезд каттамын калыбына келтирүү аракети электр жарыгынын үзгүлтүккө учураганына байланыштуу ишке ашкан жок. Метро станциялары ачык, бирок баш калкалоочу жай катары гана иштейт.
9-ноябрда Украинанын көпчүлүк аймактарында электр энергиясы өчүрүлүп жатат.
Соккудан улам поезд каттамынын жадыбалы дагы бузулду. Полтава облусунда каттам 7-9 саатка кармалды, айрым жүргүнчүлөр кийинки станцияга чейин жөө кетишти.
“Центрэнерго” компаниясы өзүнүн жылуулук электр станциясы согуш башталгандан берки эң катуу чабуулга туш болгонун билдирди. Ишкананын объектилеринде электр энергиясын иштеп чыгаруу нөлгө чейин төмөндөгөн. Учурда калыбына келтирүү иштери жүрүп жатат.
Украинанын Тышкы иштер министри Андрей Сибига Хмельницск жана Ровненск Атомдук электр станцияларын электр энергия менен камсыз кылган борбору кайрадан соккуга кабылганын билдирди. Ал Орусиянын аракеттерин өзөктүк опузалоо деп атап, МАГАТЭнин башкаруучулар кеңешин кырдаалды тез арада талкуулоого чакырды. Ал ошондой эле Кытай менен Индияны Орусияга кысым көрсөтүүгө чакырды.
Орусиянын согушту чагылдырган блогерлери орус армиясы 8-ноябрь түнү Киевдеги, Харьковдогу жылуулук электр станциясын, Днепрдеги электр борборлору, Кременчуг ГЭСи аткыланганын билдиришти.
Жекшембиге караган түнү Орусия Украинага 69 дрон учурган. Украинанын Аба күчтөрү тараткан маалыматка караганда, алардын жарымын атып түшүрүүгө мүмкүн болгон эмес. Тогуз жерде 32 учкучсуз учак жок кылынды. Жабыркагандар тууралуу маалымат айтылган жок.
8-ноябрда орус армиясынын аткылоосунан Донецк жана Херсон облусунда жергиликтүү үч тургун каза болуп, 13ү жараат алган.
Орусиянын Ульяновск облусундагы Дмитроград шаарында жайгашкан нейтрондук ядролук реакторду куруучулар (МБИР) иш таштады. "Коммерсант" басылмасы алар эки айдан бери айлык ала электигин, шаршембиде 300гө жакын адам нааразылык акциясына чыкканын жазды.
Нааразылыкка чыккан жумушчулар “Оргенергострой” компаниясынын өзүнчө бөлүмүндө иштешет. Мурдагы советтик институт миңден ашык электр станцияларын, анын ичинде өзөктүк реакторлорду курууга катышкан.
“Ульяновск облусунун жетекчилиги компания менен байланыша алган жок”,- деп жазды “Коммерсант”.
МБИР изилдөө реактору илимий эксперименттер, изилдөөлөр жана алдыңкы өзөктүк реактордун негизги элементтеринин макеттери, чакан жана орто кубаттуулуктагы жылуулук реакторлору үчүн материалдарды сыноого багытталган. Анын курулушу мындан 10 жыл мурун башталып, 2028-жылы пайдаланууга берүү пландалууда.
“Оргенергострой” долбоордун 2020-жылдагы башкы подрядчысы болуп эсептелет жана өзүнө бөлүнгөн жумушту 2027-жылы бүтүрүшү керек. Компания 33,396 млрд рубль же 413 млн долларлык тендерди утуп алган.
Тез нейтрондук реакторлор жабык циклдеги ядролук энергиянын технологиясын ишке ашырууга мүмкүндүк берет. МБИРден тышкары бул багыттагы изилдөөлөр үчүн Северскиде (БРЕСТ) реактору курулуп жатат.
Орусиянын Украина менен чектеш тилкеде жайгашкан Белгород шаары жана Белгород району чабуулга кабылып, 20 миңден ашуун тургун жарыксыз калды. Бул тууралуу аймактын башчысы Вячеслав Гладков билдирди.
Дрондордун сыныгынан бир нече гараж күйүп кетти. Алдын ала маалыматтар боюнча, жабыркагандар жок.
SHOT телегерам-каналы шаар жапырт аткылоочу реактивдүү системадан (РСЗО) аткыланганын жазды. Сыныктардын бири жергиликтүү Жылуулук электр борборуна түшкөн. Анын кесепетинен Белгороддун бир нече районунда жана Дубовое айылында жарык үзгүлтүккө учурады.
Украина соңку чабуул тууралуу комментарий бере элек.
Согуш 2022-жылы февралда Орусия коңшусуна кол салгандан бери уланып келе жатат.
8-ноябрга караган түндө Орусия Украинанын бир катар аймактарына - Днепропетровск, Сумы, Киев, Кировоград, Николаев, Полтава, Харьков облустарына жана Киев шаарына дрон жана ракеталар менен чабуул койду. Днепрде Орусиянын дрону тогуз кабаттуу үйгө тийип, эки кабаттагы батирлер жабыркады. Бир адам мерт кетти.
Маалыматтарга караганда, бир нече электростанция жабыркады. Харьковдо метро ишин токтотту, электр энергиясы жана суу менен камсыздоо үзгүлтүккө учурады. Шаарда жылынуучу түйүндөр ачылганы кабарланды.
Кременчуг шаарынын мэри Виталий Малецкий чабуулдан улам электр берүү үзгүлтүккө учураганын билдирди. Ушундай эле көйгөй катар жайгашкан Горишние Плавни шаарында да жаралды.
Полтавада чабуулдун кесепетинен темир жол бузулуп, аймакты Батыш Украина жана Киев менен байланыштырган бир нече поезд каттамы токтотулду. Бул түнү дрондордон тышкары украин тарапка он чакты "Искандер-М", "Кинжал", "Калибр" жана Х-69 аталыштагы баллистикалык жана жөнөкөй ракеталар учурулганы да кабарланды.
Орусия Украинага кол салган 2022-жылдын февралынан бери дрон, ракета чабуулдарынан жай тургундар жабыркаган учурлар аз эмес. Орус бийлиги бутага аскердик-техникалык ишканалар гана алынарын айтып, мойнуна албай келет.